تضامنت حركة شباب 6 إبريل، مع الحملة التي أطلقها عدد من النشطاء لتسليط الضوء على معاناة المعتقلين السياسيين من عقوبة الحبس الانفرادي.

وجاء في منشور بثته الحركة عبر صفحتها الرسمية بموقع التواصل الاجتماعي "فيس بوك": "الحبس الانفرادي له ضوابط وشروط ومنها حسب قانون السجون: إنه عقاب على تهمة ما يلزملها تحقيق وسماع شهود قبل صدور القرار، سقف العقاب 30 يوم وده اخره، الحبس بيكون زنزانة انفرادي 22 ساعة وساعتين تريض مع اخرين وزيارة مع اخرين".

وتابعت: "القانون رقم ٣٩٦ بشان تنظيم السجون بيوضح ان في اشراف عام قضائى للنائب العام ووكلائه على السجون، وانهم بيتقدم لهم الشكاوى لمنع الفعل المخالف، ده معناه ايه ؟! معناه ان المعتقلين اللي بنتكلم عنهم بيقضوا عقوبتهم انفرادي بدون تهمة او تحقيق، وبكسر سقف المدة، وممنوع عن بعضهم الزيارة، وكله بيتريض لوحده مش مع اخرين لو حصل، واللي له زيارة بيبقى وحده برضه مش مع اخرين".

وواصلت :"يعني معظم الشروط مش موجودة في حالتنا وواضح انتهاك قانونهم بنفسهم !بما ان فيه اشراف قضائي للنائب العام يبقى لازم يوصل للنائب العام شكاوي بالمخالفات دي، هل هايتحرك؟! في الأغلب لأ، وعشان كدة هيكون هو كمان مخالف للقوانين، ومن حقنا فضح كل مخالف".