يا مفوضين البلد

يا خاينين البلد

يا ديابه وثعالب

 

اليوم ده يومك يا واد .

والفرصه جاتلك يا واد .

خليك مع الغالب ..

 

هيا حياتنا كدا

لازم نعيشها كدا

متعودينها كده ..

أنتيكه ومقالب ..

 

بلغ عن الجيران

لا تقوللى ده غلبان ..

لا تقوللى ده عشمان

لا تقوللى ده طالب ..

 

ونقول هنا اخوان

ونقول هنا ارهاب

وتقول ده متطرف

ونقول ده له مخالب

.

قوم يالله لف ودور ...

روح بلغ المأمور ...

واشهد عليه بالزور ..

شايل لنا شومه .

وضربنا بالقالب .

 

واعمل رئيس تحرير .

واكتب فى ده تقرير .

لو حتى بالتزوير .

لو حتى بالسالب ..

 

حتصاحب المخبر ..

وحتشخط وتنتر ..

والناس تقول اؤمر .

لو ايها مطالب .

 

يا مفوضين البلد

غربان وبوم البلد .

عكيتوا أهل البلد .

وشهدتوا زور ع البلد .

. يا ديابه وثعالب

.

.

يا مفوضين البلد .

يا وش شوم ع البلد .

شمتوا فيكوا البلد .

ضحكت عليكوا البلد .

يا غلابه يا مساكين .

.

واهى دارت الايام .

آخرك بقيت خدام .

وصحيتوا م الاوهام .

واهى ضاعت الاحلام .

راحت لناس تانيين .

.

اللى أخد ترقيه ..

واللى ابنوا راح كليه ..

ف الشرطه والحربيه ...

وانتو خيبتكوا قويه ...

عايشين فى قلب الطين ...

.

لا عملت ولا سويت .

والزرع مات ف الغيط .

شايلين هموم البيت .

ولا عدتوا لاقيين زيت .

ولا سكر التموين .

 

وبقت بلد مفلسه .

ولا علم فى مدرسه .

ولا مصلحه كويسه .

وحكومة المحلسه .

ولا عدش فيه تأمين ...

 

ورضيتوا بالتتزوير ..

شغال لصالح الغير .

والحر يبقى اسير ..

واللى سرقكوا وزير .

وخسرتوا يوم الدين