روت أمنية فوزي، تفاصيل زيارتها لزوجها الصحفي المحبوس سيد عبداللاه، مطالبة بسرعة إخلاء سبيله وتخفيف معاناة أسرتها.

وقالت أمنية: “خلصت الزيارة بعد معاناه علشان أعرف أدخل لأني نسيت شهادات ميلاد الأولاد وسيبتهم لوحدهم الـ٣ عالباب السجن وأول ما رجعت مروان قاللي كنت بدعي ربنا أنه يحمينا وإحنا لوحدنا”.

وتابعت: نيجي للجزء الأهم للأسف النهاردة شفت شخص غير اللي كنت أعرفه تماما حطام إنسان، شخص عنيف حاد بيحاول يكون لطيف معانا لكن مش عارف ده مش سيد أبدًا اللي أعرفه ردود أفعاله صعبة وغير متوقعة، ده غير فقدانه للوزن بشكل ملحوظ (جوزي بيضيع مني انقذوا سيد عبداللاه).

وأضافت: للأسف أنا كمان وصلت لمرحلة صعبة جدا، حتى مقدرتش أواسيه من سوء الحالة اللي وصلتلها، واللي صعب الوضع أكتر أنهم رفضوا الولاد تسلم عالسيد، وده لوحده كسر سيد جدا جدا جدا، غير الحالة النفسية لأولادي طبعا، وكل اللي بيقوله أنا عايز أخرج علشان أخدكم فحضني، ولما سألته آسر كبر صح سكت ماردش كررت السؤال تاني لأنه كان سرحان بس اتضح أنه كان مركز معايا جدا لأنه قاللي كبر بس مش فحضني”.

وأضافت زوجة سيد عبد اللاه: “أسرتي انهارت خلاص لا أنا قادرة أقاوم ولا سيد قادر إحنا الاتنين الكلمة اللي أصبحت على لسانا (أنا بموت)، انقذوا ما تبقي من حطام أسرتي”.