قال محمد عادل، عضو فرقة أطفال الشوارع المحبوس حاليًا بتهمتي التحريض على التظاهر، ونشر فيديوهات على الإنترنت تتعرض لمؤسسات الانقلاب "محدش يستهون بأي كلمة حتى ولو صغيرة لواحد مسجون.. "شد حيلك" أو "ما تخافش".. أنا اعرف هنا ناس اللي مانعها تتجن أو تموّت نفسها كلمة صغيرة من دول".

وأضاف عادل -خلال رسالة من داخل زانزانته- "أنا بابص على النتيجة ست سبع مرات الاقيها نفس اليوم.. زهقت.. اليوم هنا في السجن طويل لدرجة إني بانام وباقوم ست سبع مرات في نفس اليوم".

وتابع "في السجن هنا رجالة بشنبات بتتكور تحت ملاياتها بليل ويعيطوا.. السجن بيكسر الناس.. أنا كل ما أتكور تحت ملاية أمي علشان اتكسر واعيط اشم ريحة معفنة اروح قايم".

واستكمل "أي هواية في السجن مملة.. القراية مملة.. الكتابة مملة.. الغنا ممل.. الناس برا عايشة في نعمة مش مقدراها.. أكبر نعمة في الكون إنك تقوم وتفتح باب الأوضة وتنزل الشارع.. عدى علينا أكتر من خمسة جايين يقابلوا السيسي واتقبض عليهم عند قصر الاتحادية وجم بيّتوا هنا.. واحد منهم مصمم انه المهدي المنتظر.. طمني عليكوا برا.. انتوا اتجننتوا"؟

واستطرد "معانا دكتور اقتصاد ولواء جيش ومهندس ومترجم في الداخلية وسكرتير نيابة ودكتور وممرض ورجل أعمال وشيخ أزهري.. أنا نفسي افهم مين لسه برا"؟

واختتم "فيه ناس ما كنتش أتوقع أبدًا يييجوا جم.. وناس كنت مستنيهم يباتوا ليل نهار قدام القسم شوفت وشهم مرة صدفة كده وخلاص.. الصحاب بيتغربلوا يا كبير".

ويحاكم أعضاء فرصة أطفال الشوارع بتهمة التحريض على قلب نظام الحكم وإهانة مؤسسات الانقلاب.